Die Friehyaahr Hitz!

Guder Daag Blog Leser! Well do bin ich widder mit em neien Blog Poscht! Selle Woch hawwich die Freihyaahr Hitz. Ich glaab as viel vun eich sie aa hett, gell? Vielleicht ennich-epper wisst net was die Freihyaahr Hitz iss? Ich weess as es hot en annere Naame aa: die Blockhaus Hitz. Ennichhau, die Freihyaahr Hitz iss wann mer ready fer es Friehyaahr iss awwer ‘sis nooch net Friehyaahr. Ich hab genunk vun in em Haus zu sei…ich will raus! Ich will in mei Gaarde schaffe, ich will Blume sehne un rieche, ich will mei Graas maehe un viel annere Dinge aa!

Die letschde Woch hemmer do, wu ich wuhn, en gleene Gschmack vun em Friehyaahr ghatt. Die Temperatures waare zimmlich mild un die Sunn waar arrig hell. Ich bin raus vun re Arewet kumme un ich waar so froh die Sunn zu sehne. Awwer, ich weess, viel vun eich waerret saage: Nau Douglas, ‘sis yuscht Matz! Der Winder iss nooch nett vorbei un es Friehyaahr iss nooch nett kumme. Ich weess, ich weess, awwer deswege saag ich as ich die Friehyaahr Hitz hawwe…un ich hab es arrig schlecht. Ich denk der ganze Daag uff warmen Wedder un grien Graas. Ich kann frische Gaardesach aus mei Gaarde schmacke. Ich will mei Motorcycle faahre un ich will fische geh. Aye yummer, ich weess net was ich duh soll. Es Friehyaahr kann nett schtarrig genunk kumme.

Wie iss es fer eich? Seid dihr aa ready fer es Friehyaahr? Ich glaab mir misse nooch ee paar Woch waarde bis es Friehyaahr do iss.

Do is en Audio Klip: Die Freihyaahr Hitz!

4 thoughts on “Die Friehyaahr Hitz!

  1. Die Mischtgawwel 04/03/2012 — 15:31

    Ei, Doug, ferwas hoscht du schunn die Friehyaahr Hitz? Mir henn noch schier gaar ken Winder ghatt! ‘S gebt noch yo ken Gelegeheet fer am Schkeede geh, sogaar. Geb mir yuscht en Bissel meh Schnee…mei Fraa hot deiere Schneehosse fer unsre Kinner kaaft, unn sie henn sie yuscht eemol geyuust! Die Kinner waxe so gschwind uff, ass die Schneehosse warre neegscht Yaahr zu glee sei. Ya, well, so geht’s. Was kammer duh?

  2. Kevin,

    Ya, ya ich weess. Mir hen ken richdige Winder ghatt. Ich bin en Schnee Freind. Ich gleich Schneemaschine zu faahre, un selles Yaahr hawwich ken Meil gfaahre! Un ich gleich aa in re Schnee zu laafe. Awwer, du weesscht aa as mir hen schunn Schneeschturme in Matz grickt….en Oschderschnee. Mol sehne was kummt. Vielleicht kenne dei Kinner nooch ihre Schneehosse yuse!

  3. Yoh, un doh hock ich un friere. Geschdere Owwet waar’s bloos 20 Graad, unn Heit hemmer Schnee griggt. Die Schtroosse waare alle gans eisich am frieh Marriye. Nau um 2:00 Uhr is’s bloos 35 graad! Heit hot der Wedderkall im Radio gsaat ass’s fascht 70 Graad watt sei.
    Fiel Glick mit em Gaarde. Mer misse waarde bis de Mitt vun Abrill.
    bil aus nattoscht NeiMexiko

  4. Bil!

    ‘Sis gut eppes widder vun dir zu heere! Ya unser Winder waar arrig ken Winder mir hen warricklich viel Glick ghatt. Awwer vielleicht is sell en schlechde Ding. Mol sehn was im Summer kummt. Schpielscht du allsfatt nooch dei Geig? Ich hab en neie Mandolin vor baut ee Munet gkaaft.

    -Der Doug

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this:
search previous next tag category expand menu location phone mail time cart zoom edit close