Ich waar net die Aschepuddel!

Guder Daag Blog Leser! Well nau sin mir in re Faschtzeit. Ya, Dinschdaag waar Faschnacht. Uff em Samschdaag hawwich schunn mei Faasnachtkuchli gemacht. Dann hawwich sie die naegschde drei Daag arrig oft gesse. Die waare so appeditlich. Dann is der Aschermittwoch kumme. Nadierlich bin ich in re Karrich gange um mei Asche zu griege. Ich find em Aschermittwoch sei Gottesdinscht arrig beweglich. Wann der Paare saagt “Errinere, as du vun Schtaab kumme bischt, un in Schtaab witt du zerickgeh” muss ich viel uff selle Wadde denke. As en Soh vun re Familye vun Bauere find ich selle Wadde meenigvoll. Nau misse mir 40 Daage waarde bis Oschder. Normally, Leit solle eppes abgewwe darrich die Faschtzeit. Ich un mei Fraa hen ausgemacht, ken Rinsfleesch zu esse. Ich glaab sell waerd net so hart sei.

Awwer Aschermittwoch hot en annere alde deitsche Tradition: die Aschepuddel. Kennt dihr sell? Tradition saagt as der Paerson der am letsch aus em Bett uff em Aschermittwoch kummt iss die Aschepuddel. Die Aschepuddel iss net en gude Ding zu sei. Tradition saagt as die Aschepuddel alle die Hausarewet fer der Daag duhe muss. Un die annere Familyeleit kenne nadierlich der ganze Daag Gschpass mit re Aschepuddel hawwe. In de Alde Zeite wann die Aschepuddel en Kind waar, hen die Aschepuddel aa die Arewet an die Schul duhe muss. Zum Beischpiel hot die Aschepuddel gemisst die Asche rauszunemme.

En annere alde Tradition fer Aschermittwoch waar as der Mann vun em Haus all die Asche zammegrickt hot un dann hot er all die Kieh un annere Gediere mit de Asche aagschpritz. Tradition saagt as wann er sell geduh hot, waerre die Gediere ken Leis griege.

Die zwee Traditions sin schier gaar vergesse. Sie sin mit re Zeit un Yaahre gschtwarewe. Awwer, ich muss saage as ich der aerschde aus em Nescht uff em Aschermittwoch waar. Sell meehnt as mei Fraa die Aschepuddel waar. Un nadierlich hawwich sie sell gsaat un hot sie gemacht all die Hausarewet zu duh. Ich glaab sie waar net so froh fer sell awwer mer muss die Traditions behalde…Gell?

Do is en Audio Klip: Ich waar net die Aschepuddel!

4 thoughts on “Ich waar net die Aschepuddel!

  1. Die Mischtgawwel 25/02/2012 — 18:14

    Des Yaahr waar ich yo die Aeschepudel. Awwer es iss net gans mei Schuld: gwehnlich schaff ich bis zwee odder drei Uhr frieh. Alsemol verschloof ich mich!

  2. Aye aye aye, du waarscht die Aschepuddel! Yawell, vielleicht waerr naegschdes Yaahr anners?

    -Der Doug

  3. Scheen, dass ma aach in Amerika Fassnachd feiere duud! 🙂 Isch hann gedenkt, dass das nur mier in Deitschland und der Schweiz duun werde…

    Isch waar iwwrigens die Aschepuddel. Das hann isch nidd vermeide kenne, weil isch nemmlisch allein wohn. Doo sinn isch jeede Daag die erschte *unn* die ledschde beim Uffschdehe. 😉

    Hier in Finnland hadde mier am Dinnschdag “Laskiainen”. Mier hann hier kee Faasekieschelscher (eh… mier *hann* Faasekieschelscher, awwer die werre “Munkki” genannd unn ma issd se es ganndse Joohr iwwer), awwer zu Laskiainen gebbds “Laskiaispulla”. Das sinn sieße Breedscher midd Schlagroom unn Mardsipaan odder Marmelaad. Unn ma gehd Schlidde faahre; ville Erwachsene nemme sisch sogaar de Noomiddag frei, um Schlidde faahre zu geen! (E deitschi “Fassnachd” midd Feiere unn “Verbooze” (= Verkleide) hann die Finne an “Vappu”, das iss am erschde Mai.)

    ‘s Julia

  4. Julia,

    Gross Dank fer dei Poscht. Ich gleich zu wisse un lanne wie die annere Lenner ihr Feierdaage feiere. Ich winsch as mir schlidde geh kennte awwer selle Winder waar es zimlich warm un mir hen kenn Schnee ghatt!

    Ya, bevor ich gheiert waar, waar ich aa allsfatt die Aschepuddel…na ya so iss es Lewe, Gell?

    -Doug

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this:
search previous next tag category expand menu location phone mail time cart zoom edit close