Guder Daag Blog Leser! Well selles Wochend bin ich widder heem gfaahre um mei Familye mit eppes wichdig zu helfe. Alle Yaahr in September is es die Zeit unsere Grummbiere rauszuroppe.
Alle Yaahr in Abril blanst mei Daadi iwwer 100 Pounds Grummbiere in unsre Gaarde. Grummbiere sin leicht zu hawwe. Mer blanst sie im Friehyaahr un dann kann mer sie bis Schpotyaahr vergesse . Ya, nadierlich muss mer die Umgraut rausroppe un vielleicht ee paar Grummbierekeffer dodmache, awwer mer muss really net zu viel duh.
Dann kummt es Schpotyaahr un die Zeit um die Grummbiere zu aernde. Wie weess mer as sie ready sin? Wann all die Grummbiereschtengle gschtarewe sin, sin sie ready rauszuroppe. Mer kann sie eifach mit en Grummbieregawwel rausschteche awwer wann mer viel Grummbiere geblanst hot, nemmt sell zu lang. Mei Familye yusst en Traktor un en Grummbiereblug. Unser Blug is arrig alt, ich weess net wie alt er is awwer verdammtsei alt. Alt er is, awwer es geht immernooch.
Normally, faahr ich der Traktor un mei Daadi geht hinnich der Blug. As ich en Kind waar, hab ich gemisst yuscht datt zu schteh un gucke bis die Grummbiere rausgeblugt waare. Awwer nau bin ich der Faahrer. Nooch der Traktor un Blug darrich es Gaarde gange sin, is es die Zeit alle die Grummbiere zu finne. Mer muss der Grund rumkicke um all die Grummbiere zu finne. Dann losse mir sie dattliege um abzudrickle. Dann muss mer all die Grummbiere ufflese.
Wann all die Grummbiere uffgelese sin, gehne sie in em Keller fer es Winder. Nau hot mer Grummbiere zu esse. Selles Yaahr hen unsere Grummbiere net so gut geduh. Der Summer waar zu heess un drucke, un dann hemmer en Hurrikane grickt un es waar zu nass. Geschder wann mir die Grummbiere rausgeroppt hen, waar es arrig schlimm. Der Daadi hot sex Roi geblanst un mir hen yuscht baut vier Buschel grickt! Normally griege mir 2o odder 30 Buschel! Ya, selles Yaahr waar net so gut. Awwer so geht es uff en Bauerei, ‘sis allsfatt en Gamble. Hoffetlich waerd naegschdes Yaahr besser!
Do is en Audio Klip: Grummbiere rausroppe!
PA Dutch 101 
Sell iss schlimm ass Dihr so wennich Grummbiere rausrobbe henn kenne. Die Gleiche hemmer aa — die Tschilies waare wennich unn die gude waare hatt zerfinne.
Gewennlich, liewwich ne Misching gschwischde rood unn grie (Tschilies) awwe in sellem Yaahr griggt mer bloos grie.
Ich hab all die Argyuments widde des ‘Wedder Ennering’ gheert, awwe unser Tschilie-kropps sinn net meh richtig. Mer gleicht die scheeni Misching (mer saage ‘Grischtmas Tschilies’) awwe mer grigge sie net meh. Die sinn net doh!
Sell iss bei uns ebbes letze.
Eeni Froog: waar’s Wedder ausse geweehnlich?
Bei uns, in NM, iss die Andwatt en groosi ‘Yoh.’ Uns waars Endprodukt en grooss “Oh crap! Net noochemol.”
Ich hab heit marriye gheehrt ass sell Yaahr waar ‘s heeschte anre Rekord innehalb 200 Yaahre. Sell wunnert mich ferwas saage so fiele ‘Mer henn kee Broblem’ wenn so fiele Baure leide unnich weennich Produkt. Ass ich denk driwwe: ‘Wennich Produkt = ee Broblem.’
Mer winsche ass ‘s Eich unn uns ‘s aa im naechschte Yaahr besser iss, awwe die Rekord saagt en groose ‘Nee, ‘s watt net so geh.’
Ich saag Dir ass ich meini Tschilies grigge hab, awwe die sinn alle grie. Keeni roodi — die sinn alle grieni. Enddeischt binnich.
Was denkscht driwwe?
der Bil ausre Wieschti fun nattoscht NM
Bil,
Unsre Wedder selle Summer waar arrig wierd. Mir hen gaar ken Rege de ganze Tschulei un dann in Auguscht hot es arrig viel gereggert (zwee Tropikal Schtaerms). Aa, in Freihyaahr waar es aa arrig nass. Ich glaab die Grummbeiere hen net gewisst was zu duh! Ich weess as selle Global Warming hot eppes mit es zu duh. Wie waerd die Zukumft? ‘Sis kann sei as so en Yaahr is die neie Normal? Aye aye aye, ich hoff net.
-Der Doug