Guder Daag Blog Leser! Well, der Summer ist schier gaar vorbei un alle wisse was sell mehnt: ‘sis die Zeit widder in die Schul zu geh! Viel Kinner hasse selle Zeit, sie gleiche der Summer un all ihre Freizeit. Awwer nau misse sie widder in en Schtubb hocke un zu re Schulmeeschder heere. Schunn lange do bei mir hen sie Schtors ihre “Zerick zu Schul” Absetz. Die Eldre nemme ihre Kinner in die Schtors un kaafe sie neie Gleeder, vielleicht en neie Schulsack un viel Bleipensils, Feddre, Ausgretzer un nadierlich viel Babier. Well, vielliecht is es net so heitzudaage, vielleicht die Eldre kaafe ihre Kinner yuscht en neie Wadderfresser, en iPod odder en fancy iPad. Ya, die Kinner schreiwe ihre Notes nau mit de neie Technology! Vielleicht die Bleipensil un Fedder sin dod? Ich hoff net, awwer es kann bald sei kumme!
‘Sis nix yuscht die Dinge die mer heit kaafe. Die Schul is aa arrig anners as es viel Yaahre zerick waar. Die Daage vun en Een-Schtubb Schulhaus sin lang vorbei. Heitzudaage sin die Schuls gross mit viel viel Schtuwwe un sie koschde millyonen vun Dollars zu baue. Wie die Kinner zu Schul kumme is aa anners. Ich weess as mei Grosseldre hen gemisst zu laafe, un es hot nix gemacht wie es Wedder waar: Schnee, Eis, Rege…macht nix, mer muss zu Schul geh. Heitzudaage gebt es viel Busse die kumme zu de Kinner ihr Haus un dann faahre sie graad zu Schul! Ei, die Kinner hen es arrig leicht heitzudaage, gell?
Well, ich bin en Schulmeeschder un ich bin arrig froh wann selle Zeit widder rumkummt. Ich gleich widder in die Schul zu geh, all die Kinner zu sehne un en neies Yaahr aazufange. Viel Kinner sin uffgeregt ihre Freinde widder zu sehne un aa uffgeregt eppes neies zu lanne. Ich weess sell is net so fer all die Kinner, awwer ich muss ehrlich saage, as viel vun mei Highschul Kinner sin ya uff em aerschde Daag zimmlich uffgeregt!
Wie waare eier Schuldaage? Seid eich in en Een-Schtubb Schulhaus gange? Was hett eich gaarn in die Schul ghatt?
Do is en Audio Klip: ‘Sis die Zeit widder in die Schul zu geh!
PA Dutch 101 
Ich waar in Mich. uffgewaxe. Dohmols hemmer all die Schteddel im ee Schul zamme; ‘s heescht Temperance unn Lembertvill allesamme. Feinde waare mir mittenanner. Temperance waare alle Englisch odde Franzeesisch unn Lembertvill alle Deitsch odde Polnisch. Mei Fadder hot enni franzeesische Fraa vun Temperance kheiert, unn ‘s waar net gut gduh odde rauskumme.
‘S waar OK bei meinre Mudder ihr Fadder bekaas er waar en schottissche Kall wu hot Deitsch lanne misse fer in der Schul geh (er waar in Ohio uffgewaxe). Awwe am End, wann mei Mudder gschtarewwe iss hot’s keeni Leicht fer ihr gewwe. (Selli iss ne langi Schtorie.)
Noch en Problem. Ich waar bloos 16 Yaahre alt unn waar in Renee Goldsmith ferliebt. Mei Vadder hot ‘nee’ dezu gsaat bekaas Renee sott mei Kusine sei. Mei Vadder seini Schweschter hot mir 3 Yaahre zrick gsaat ass ‘Nee, sie waar deini Kusine net! Sie waar aus ne annre Familye unn zu Dir net ferwandt!’ Yoh, 40 Yaahre zu schpoot.
‘S iss wunnerschee in gleeni Schteddel uffwaxe, awwe ‘s gebt imminoh Brobleme.’S iss net all schlecht unn die meenscht iss schee
Annerseits, Ich bin ee Dietscher: ass Uffgewaxene binnich Schproochteerahpischt. Ich lieb was ich duh unn wann die Leit lanne kenne, binnich driwwe froh — so ich kenn dei Ekseitment ferschteh.
Ich muss aa saage ass ich lieb imminoh fer in gleene Schteddel wuhne. ‘S gebt Brobleme fer sell zerduh, fer schur, awwe ‘s gebt fiele Benefits aa.
Am letschte: ich liewwe am Lanne sei. Wenn ich am Lanne bin, binnich am freeschte! 😀 Unn darrich die Yaahre hawwich fiel glannt (Pennsifaanische Deitsch awwe fiel annres) — ich bin dankfoohl ass ich so ebbes duh kenne. ‘S Lewwe unn Lanne sinn die Beschte unn sie heele mich unn mache mich woohl.
der bil
aus nattoscht NeiMeksiko
Bil,
Dei Poschts sin allsfatt gut zu lese! Danke aa fer dei Gschicht. Ich gleich aa zu lanne un ‘sis so wichdig fer unser Land as die Leit gscheit sin. Gell?
-Der Doug