Mei Bossdaage – Aadeel 3!

Guder Daag Blog Leser! Well selle Woch will ich mei Bossdaage Rees Gschicht faddig verzaehle. Nooch unsre Zeit in Yosemite un Bryce sin mir nooch Arizona gfaahre um es Grosse Loch zu sehne un dann allsfatt Oscht  nooch Pennsylvaania faahre.

Es Grosse Loch – is en Kanyon, es vun re Colorado Rewwer gschnitte waar. ‘Sis baut 277 Meils lang, 18 Meils breet un glee bissel meh as een Meil dief. Die Schtee vun em Grosse Loch sin arrig schee zu sehne. Sie sin rot, aarensch un mannichmol glee bissel gehl. Mir hen datt zwee Owede gecampt un hen aa en wunnerbaare Laaf nunner im Loch gemacht. ‘Sis waar arrig hees, awwer mir hen Wasser mitgebrocht un hen aa viel Sunneschitz uff unsre Haut gschmiert.

Die Jessica un ich in em Grosse Loch.

Nooch unsre Zeit in Arizon sin mir nooch Nei Mexiko gfaahre. Mir sin datt zwee Daage in Santa Fe gebliwwe. Ich hab Santa Fe arrig gut gegliche. Es gebt viel Kunscht un Gschicht datt. Sell Schtadt is arrig alt. Es waar aerscht vun der Spanische Conquistador Don Juan de Oñate in 1598 gfunne. Die Baukunscht in Santa Fe is arrig schee, all die Gebeier sin in Adobeschteil gebaut. In Santa Fe hemmer der Bil Linzie fer Owedesse gedroffe. Er is en Mann der mei Blog schunn vun Aafang aa gelese hot. Mir hen im Internet un uff em Telefon mitenanner gschwetzt un hen en Owedesse zamme geblannt. Der Bil hot es Essblatz gsaat: La Choza. Es Esse waar so appeditlich awwer aa gewaerzich. Ich denk es Nei Mexiko Esse is zu gewaerzich fer en dypikal Pennsylvaanisch Deitsche Zung…awwer ich hab es gegliche. Der Bil hot uns viel iwwer em Nei Mexiko sei Gschicht un die Leit die datt wuhne. Es waar alles so indressant.

Der Bil un ich in La Choza...aye es Esse waare gewaerzich!

Suddlich vun Santa Fe is der Carlsbad Hehl National Park. Die Hehl is arrig gross! Mer kann entweder mit en Elevator 750 Fuus nunner faahre, odder mer kann vun em Natural Entrance baut een Meil laafe. Mir sin geloffe. Ich kann eich net recht saage wie gross selle Hehl is. Ich kann eich die Nummer gewwe awwer mer misse es sehne zu glawwe! Die Schtee Formations sin so schee un farewellich.

Nooch Nei Mexiko hemmer ee paar Daage in Texas gebrocht. Mir hen en Schulfreind vun der Jessica in San Antonio bsucht. Sell is en scheene Schtadt. Mir hen die Alamo bsucht un sin aa uff em Rewwerlaaf gange. Der Rewwerlaaf waar cool. Es gebt viel Essbletz un aa viel Schtors. Texas waar schee awwer zu hees un schmodich fer mich.

Ich var der Alamo in San Antonio, Texas.

Die letschde paar Daage sin mir darrich Louisiana, Mississippi, un Tennessee gfaahre. In Lousiana hemmer en grosse Baawoll Plantation bsucht. Die Plantation waar gross un mir hen en Tour darrich es Gross Haus gemacht. Der Plantation ihr Naame waar Rosedown un die Familye die datt gelebt hot waar arrig reich. In Tennessee hemmer Shiloh National Schlachtfeld bsucht.

Sell is der Rosedown Plantation in St. Francisville, LA.

Endlich sin mir uff em 4. Tschulei widder heem kumme. Mir hen baut 8,000 Meils gfaahre, 19 Schtaate un 11 Naitonal Parks bsucht un viel viel Gas gkaaft. Ich muss echt saage as selle Rees waar arrig wunnerbaar. Mei Fraa un ich hen viel Gschpass ghatt, viel gude Esse gesse, un arrig viel scheene Nadur gesehne.

Do is en Audio Klip: Mei Bossdaage – Aadeel 3

4 thoughts on “Mei Bossdaage – Aadeel 3!

  1. ‘S hot mich arrich gefreit Dich unn dei Fraa kennezulanne. Abaddich bei La Choza (Die Waahl). Gewaerzich sinn die Esssache ferschur awwe mer muss zergewwe ass sie gutschmeckich sinn!

    ‘S hot mich gefreit ass Du mich aagerufe hoscht! Ich hett gaern annre Fescht bei Kutzdaun deelnehme, so ferleicht uffmol griggscht Du aa en Telefonaaricht vummir — naegscht Yaahr waahrschennlich net (bekaas ich imme alde Lann sei watt) awwe 2013, bass uff!! Mitme Fiddel inre Hand!

    der Bil aus NM,
    ich dank Dir un dei scheeni Fraa ass Dihr verbeikumme sinn. Dihr sinn imme wilkumme!

  2. Wow! Ich hab’s Schtick graad yetz [i]gheert[/i] un was ich gheert hab waar 8 Dausent Meile! 8 Dausent Meile iss richtich en Haafe vun Meile! 8 Dausent Meile rum de Vereenichtestaate rumfaahre iss mir unglaablich. Sell hawwich schunt geduh awwe innehalb 3 Wuche, nimmi!

    ‘S iss mir immi fannich ass was mer leese kenn, kenn anners sei ass was mer heert. (ich bin en Mensch was besser duht am Heere ass am Leese – sell hawwich schunt lange gwisst. Awwe ‘s iss immi fer mich en Surpreis fer sehne.)

    8000 Meile — wow! Kenngretschuleeschuns!

    bil aus naddoscht NM

  3. Bil,

    Ich hoff as ich in die Zukunft en Telefonruf vun dir griege! Ya, kumm mol vorbei…du bischt allsfatt bewillkumme! Ich muss dir saage: in Santa Fe hemmer en Kochbuch vun Nei Mexiko gkaaft. Mir hen es schun oft geyuust! Ich bin en Salsamache Maschien!

    -Doug

  4. Bil,

    Yo, 8,000 Meil! Ich weess sell is viel, awwer es waar net so schlecht. Mir hen viel Schwetzkaschde gheert un mei Fraa waar oft am Pickders nemme. Die Meils sin zimmlich schnell vorbeigfaahre.

    -Doug

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this:
search previous next tag category expand menu location phone mail time cart zoom edit close