Mei Bossdaage!

Guder Daag Blog Leser! Well, en anneres Schulyaahr is endlich vorbei. Die Kinner sin daheem un die Schulmeeschdern hen ee paar Woch um ihre Batteries widder zu charge. Dem Schulyaahr sei End is fer mich allsfatt bittersiess. Ich bin froh as ich glee wennich Zeit frei vun de Kinner hawwe, awwer ich bin traurig as mei Seniors weggeh. Awwer, so is es, Gell?

So, was mach ich wege mei Summer Freiheit? Well uff em Mundaag faahre ich und mei Fraa uff unsere Bossdaage! ‘Sis baut Zeit! Mir sin zerick in September gheiert awwer dann hemmer net die Zeit uff einre Bossdaage zu geh. Nau (mei Fraa is aa Schulmeeschderin) hemmer Zeit….so nau gehne mir.

Mundaag is der Aafang vun unsere drei-wochige lang Bossdaage. Die Bossdaage waerr en Rees (mit der Maschine) iwwer dem ganze Amerikaa. Mir waerre campe so oft wie meeglich. Mir waerre selle Schtaate bsuche odder darrichfaahre: PA, Ohio, Indiana, Illinois, Missouri, Kansas, Colorado, Utah, Nevada, California, Arizona, Nei Mexiko, Texas, Louisiana, Mississippi, Tennessee, Kentucky un West Virigina.

Mir waerre viel National Parks uff unsere Rees besuche wie: Rocky Mountain, Yosemite, Sequoia, die Grand Canyon, Zion, Bryce Canyon, Carlsbad Caverns un vielleicht ee paar annere. Weil mir  fer 21 Daage fatt sei waerre, waerr es ken neie Blog Poschts gewwe bis mir zerickkumme. Dann waerr ich en grosse Blog Poscht iwwer die Bossdaage schreiwe, un es waerr viel Pickders aa hawwe. Ich hoff as alles gut geht un aa as es Wedder gut sei waerr. Macht’s gut bis ich widder in Pennsylvaania bin!

Do is en Audio Klip: Mei Bossdaage!

3 thoughts on “Mei Bossdaage!

  1. En guudi Rees un en latt Gschpass!

  2. Gross Dank Michel!

  3. Joh, ich winsch Eich aa ne scheeni Rees! Ruf mich aa!

    Yetz sehne mer fiele Wildfeier (Wallowfeier, Pacheco Canyonfeier, Roswellfeier un der Ratonfeier, un die sinn alle 3 Schtunne odde wennicher vun mei Haus. Ich hab der Rauch zidder 25. Moi schmecke kenne. Ich muss saage ass fer de Rauch uffre Windernacht schmecke iss ebbes annres ass fer de Rauch amme Sommerdaag graad inre Mitt ne Druckeheit schmecke — ‘s aerscht Eksempel bringt mit en schee Gfiehl awwe ‘s letscht bringt Unruh! (700 Schkweermeili iss der ‘Wallowfeier’ heit schunt un wennicher ass 20% eigehemmt — unn der Ratonfeier 0% eigehemmt mit meh ass 3000 Eckers shunt ferbrannt!) Seit fahsichtich unn basst uff! Uffre anner Seit ‘Wilkummet.’

    Alles iss net schepp gange: ‘s gebt ne scheeni Seit mit alle selli Feiere — die Sunnunnergenge sinn alle schee. (Henkershumor weesich, awwe mer muss ebbes schee drinn finne, gell?) Mer henn schier gaar kenn Wasser fer drinke meh unn waarde uff de Reggert . . . Wenn’s Wasser im Ressiwuhah alle iss, hemmer Brobleme. Schunt bassiert doh im Nei Mexiko awwe doh in Las Vegas net. (Ich wees’s schunt ass Wasser ausme Himmel fer 4. Yuli runnerkummt — so iss’s immi inre Fergangeheet gkumme bekaas mer henn unser ‘Schtadtfeier’ — nimmi iss’s ferfehlt.) Schtinkt nau unn dann awwe ‘s Wasserkumme iss immi wilkumme.

    Ich geb Eich bloos en Heddsup (macht doh doch keeni Feiere) unn basst Eich uff. I will ass ich Eich nimme Hoschbiddel sehne! Unn ruf mich aa! Mer kenne samme esse, un doh iss ‘s arrich wichtich ee bissel Bier nunnerschlucke mit ee bissel Salsa unn Tschips unn ferleicht ChilisRellenos odde am beschte Menudo — heescht uff Deitsch ‘Rindemaage mit Chile’ — am beschte, friemarriye noochdem mer am Nacht ee bissel zu fiele Biere gdrunke hot. ‘S macht alles gut unn ruhich.

    Bossdaage selle Gschpassdaage sei! (Eh, wenn ich richtich meinde kenn! 😉 )

    Scheeni Rees, Eich!
    der Bil ausme nattoscht NM

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this:
search previous next tag category expand menu location phone mail time cart zoom edit close