En wichdiger Deitscher – Aadeel 3!

Guder Daag Blog Leser! Geschder waar ich in Hershey, Pennsylvaania. Ich hab gedenkt as ich sellre Woch ihr Poscht soll iwwer der wichdige Deitscher: der Milton S. Hershey sei. Der Milton waar uff em 13. September 1857 uff re Bauerei in Derry Church, Dauphin Kaunty, gebore. Er waar der eenigschde Soh vun der Fannie un dem Henry Hershey. Die Hersheys waare Mennischde. Sie sin oft hiegezogge un deswege hot der Milton yuscht das vierde Yaahr vun der Schul faddiggemacht.

Nooch en vier Yaahre lang Brendisschip mit en Zuckersachmacher in Lengeschder, hot der Milton sei aerschde Zuckersachkumpanie in Philadelphie gegrindt. Selle Kumpanie un zwee annere Browiere in Chicago un New York sin darrichgfalle. Er is in 1883 widder zerick nooch Lengeschder kumme un hot die Lengeschder Caramel Kumpanie gegrindt. Selle Kumpanie is schnell en Glick gewest.

Im 1893 hot der Hershey die World’s Columbian Exposition bsucht. Datt hot er en Hochdeitsche Schokolaad Maschien gesehne. Er hot die Maschine gkaaft un bald hot er aagfange Schokolaad zu mache. Er is dann vun Lengeschder zerick nooch Derry Church hiegezogge fer en neie Factory zu baue. Er is nooch Derry Church gange, weil er hot gewisst as er datt viel gude Millich fer sei Schokolaad griege kennt. Hershey’s Millichschokolaad waar die aerschde nationally verkaafte Ardickel vun selle Aart.

Der Milton waar endlich en grosse Glick. Awwer er waar nooch net faddig! Er hot gewollt en gude Blatz hawwe fer seinre Kumpanie ihre Schaffleit. So er hot en Schtadt gebaut: Hershey, Pennsylvaania. Die Schtadt hot en Schul, scheene Heiser un Public Transportation. In 1907 hot er Hershey Park gebaut. Der Park waar en Blatz fer sei Schaffleit ihr Freizeit zu verbringe.

Er hot aa die Hotel Hershey, en Gemeeschaftcenter, en Theater un en Schportblatz gebaut. Alle selle Dinge hen Hershey, PA, en grosse Tourist Attraction gemacht. Dem Milton sei Glick hen ihn bewillicht en grosse Menschefreindheit zu duhe. In 1909, er un sei Fraa hen en Schul fer Waisekinner gebaut. Der Milton is im Yaahr 1945 gschtarewe. Er waar 88 Yaahre alt. Seit dann is seine Legacy gewaxe. Alle Yaahr, helft die Hershey Schul meh as 1,100 Kinner. Alle Yaahr kumme dausende vun Leit zu Hershey Park fer die Rollercoasters un annere Rides zu luschdere. Un wer vun eich hett nie en Schtick Hersheys net gesse? Er waar un is en wichdiger Deitscher!

Do is en Audio Klip: En wichdiger Deitscher – Aadeel 3!