Guder Daag Blog Leser! Well ich muss en annere Blog Poscht iwwer en Feierdaag, der in Hanning do in Amerikaa is. Mundaag is Bresidents Daag, es gebt ken Poscht, ken Schul un die Baenks sin aa nett uff.
Im Yaahr 1880, hot unser Kongress der dritte Hanning en Feierdaag gemacht. Zur selle Zeit waar es dem Waschington sei Gebottsdaag benaamt. Darrich die 1900s hot Kongress gewollt nicht yuscht dem Waschington zu ehre, awwer aa all die annere Bresidents, awwer nix is vun sell auskumme. Es waar in de 1980s wann Kumpanies hen aagfaange “Bresidents Daag Sales” zu hawwe. Vun was ich gelese hab, hot die Regiering es Naame vun dem Waschington sei Gebottsdaag zu Bresidents Daag nimmi officially ge-ennert.
Do sin ee paar Facts iwwer die Bresidents un ihre Gebottsdaage:
1. Zwee wichdige Bresidents hen ihre Gebottsdaage in Hanning: der Waschington un der Lincoln.
2. Es gebt zwee annere Bresidents mit em Hanning Gebottsdaag: der William Henry Harrison un der Ronald Reagan.
3. Zur Zeit hemmer 44 Bresidents ghat.
4. Der Bresident, der nau in em Weiss Haus wuhnt, hot en Gebottsdaag in Auguscht.
5. Der Munet mit de menschten bresidential Gebottsdaage is Oktower mit sex: der Jimmy Carter, der Rutherford B. Hayes, der Chester Arthur, der Dwight Eisenhower, der Theordore Roosevelt, un der John Adams.
6. Die Munete mit de wennichste bresidential Gebottsdaage sin Tschuun mit dem George H. W. Bush un September mit dem William Howard Taft.
7. Es gebt yuscht een Daag im Yaahr, der zwee Bresidents deele: der Zwette November, un die sin der Warren G. Harding un der James K. Polk.
8. Der eenzichste Bresident vun Pennsylvaania, der James Buchanan, hot sei Gebottsdaag uff em 23. Abrill.
9. Der Schtaat, wu die menschte Bresidents gebore waare is Virginia. Acht Bresidents waare in Virginia gebore: der George Waschington, der Thomas Jefferson, der James Madison, der James Monroe, der William Henry Harrison, der John Tyler, der Zachary Taylor, un der Woodrow Wilson.
Unsere Bresidents hen so viel Gudes un aa mannichmol Schlechdes fer unser Land geduh. Ich hoff as uff em Mundaag, all mei Blog Lesers kenne en Minudde nemme um en Gross Dank zu saage an all unsere Bresidents. ‘Sis en Job, es ich nett duhe wott. Es gebt zu viel Schtress un zu viele grosse Decisions zu mache.
Was denkt eich? Wottet eich Bresident sei?
Do is en Audio Klip: De Bresidents ihr Daag!
PA Dutch 101 
Wottich Bresident sei? Nimmi! Mei Tschob iss schwaer genunk!
Du hoscht fergesse zu erwaehne ass em Eisenhower sei Mudder vumme Bleinfolk waar un hot Deitsch schwetze kenne. Eb der Eisenhower ‘s Deitschschwetze ferschtanne kenne odde net weesich gaar net.
bil aus NM
Ya Bill, mei Job is aa hatt genunk! Ya, ich sott meh iwwer der Eisenhower schreiwe awwer ich hab vergesse. Veilleicht kann ich en ganze Poscht iwwer ihn schpaeder schreiwe. Ich weess aa net eb der Eisenhower Deitsch verschtanne kennt odder net. Wann sei Mudder Deitsch gschwetzt hot, denk ich as ihn es aa gheert hot…Gell?