Guder Daag Blog Leser! Well, Dinschdaag is en wichdige Daag fer uns Deitsche! Uff em Zwette Hanning is Grundsaudaag. Ich hab gedenkt as selle Wochs waerr ich glee bissel vun re Gschichde selle Feierdaag schreiwe.
Grundsaudaag is en Feierdaag, der uff em zwette Hanning in Amerikaa gfeiert is. Die Gschichde geht so: wann es drieb is un der Grundsau aus seinem Loch kummt, waerrd er sei Loch verlosse. Sell meehnt as der Winder schunn bald vorbei is. Awwer wann es sunnich is, waerrd der Grundsau sei Schadde sehne un zerick ins Loch laafe, un der Winder waerrd fer sechs Woch meh ausdauere.
Heitzudaag gebt es viele Feschte frieh am Mariyet um der Grundsau zu sehne. In Sudd-oscht Pennsylvaania, Grundsau Lodges feiere es Feschtdaag mit Versommlinge. Versommlinge sin Feschde wu es en Iems gebt, Redde sin ghalde, un vielleicht glee bissel Muysick in em Mudderschprooch sin gschpielt un gsunge. Uff soddiche Feschde gebt es yuscht Deitsch, wann epper en Englische Wadde saagt, muss mer Geld bezaahle!
Der Feierdaag hot as en Pennsylvaanisch Deitsche Kustom in Sudd-oscht Pennsylvaania in em 18. un 19. Yaahrhunnert aagfange, hot sei Aafang in alde Europaische Wedder Gschichde. Datt hot es en Badger es Wedder gsaagt. Es greeschde Grundsau Fescht is in Punxsutawney, Pennsylvaania. Der Grundsau datt heest Punsutawney Phil. Der Haaptmenner vun Punxsutawney draage Tuxedos un Schtitzhiet fer es Fescht!
Der Grundsau (Marmota monax) is en Freindschaft vun re Eechhaas Familye! Sell hab ich net gwisst! Der Winder bis nau is arrig kalt gewest un es hot viel Schnee schunn gewwe. Ich hoff as uff em Dinschdaag, der Phil sei Schadde net sehne waerrd! Was denkt eich?
Do is en Audio Klip: Em Grundsau sei Daag!
PA Dutch 101 
Well, ‘s gut ass er sei Schadde net gsehne hot bekaas geschdere Owwet binnich schier bis zum Dood gfrore. ‘S waar -16. ‘S guut ass ich in en Adobehaus wuhn. Ich hab all die Daere zumache misse so ass die Hitz bhalde inre Kich, Wuhnschtubb, un Schloofschtubb!
So iss’s Lewwe im Winder in NM.
bil aus NM
Nau ass ich driwwe denke waar Grundsaudaag bei uns abbadich wichdich. ‘S iss mir yetz funny fer noochdenke awwe ‘s waar immi wichdich fer wisse eb de Grundsau die Schadde gsehne hot odde net. ‘S waar abbadich en gross Ding in der Schul. Frau-e Wheaton un Eisenman henn fiel drauss gmacht.
Mei Vadder iss immi frieh naus gange fer sehne eb die Sunn Scheint odde eb’s newwlich waar un iss reikumme fer ennanse eb der Grundsau ihr Schadde gsehne hot kenne odde net.
Nau ass ich noochdenke hemmer kee Grundsei im Winder aerlich ghot, awwe mer henn ihm, meim Vadder, glaabt. Yoh, ‘s waar en gross Ding bei uns dohmols un bei mir imminooch. Ich will im Radio immi heere eb ‘s Gdier die Schadde gsehne hot odde net.
Sellemol net. Keeni Schadde un Gott sei dank bekaas mei Peips sinn geschdere gebroche un yetz hawwich Wasser im Bortsch (ebbes mitre Waschmaschien zer duh.)
Mer warre sehne . . .
lewwe woohl,
bil aus NM
des is a luschdiche sach! in germany hemmer leider keine solche viecher!! sorry for my bad deitsch. ich verschteh eich guud, aber weiß ned wie ichs schreibe soll. robert aus deitschland.
Robert,
Gross Dank fer dei Comment! Ya, viele Deitsche kenne unser Schprooch yuscht schwetze, viele henn es net gelannt zu schreiwe. Un, der Phil hot arrig falsch selles Yaahr ghatt. ‘Sis schunn Abrill un nooch Winder do in Pennsylvaania! Ich hoff as es Freihyaahr bald kummt!
-Der Doug