Heit hab ich in die Zeiting gelese as es nooch widder en Schiesserei do in Amerikaa gewwe hot. Selles Mol waar es in Arizona gewest. En Kongressfraa hot en Town Meeting ghatt un en yunge Mann is uff em Stage glaafe un hot die Kongressfraa in ihrem Kopp gschosse, dann hot er sich rumgedreht un hot in die Crowd gschosse. Wann alles vorbei waar, waare 6 Leit Dot, 19 beschaedicht un nau die Kongressfraa liegt in Grankehaus un es guckt net gut fer sie aus.
Die Kongressfraa, die Gabrielle Giffords, waar en Demokraat un der Schiesser, en 22 yaahrige Bu, waar arrig bees weeich Fraa Giffords Bolitikal Ideas. Ich kann net verschtehe was is letzt mit soddiche Leit. Ya, ich hab mei bolitikal Ideas un sie sin net die gleiche vun annere Leit, awwer sell is keen Grund rum zu laafe mit en Flint un Leit schiesse! Ich hab gedenkt as Amerikaa en Freies Land waare, un en Demokratie wu Leit frei sin zu denke was sie wolle. Mei Amerikaa is en Land wu verschiddliche Ideas vun verschiddliche Leit zammekumme kenne um en besseres Land zu schaffe. Unsere Founding Daadis waerre aa so denke, Gell?
Wer hot Schuld? Ich weess net was zu saage, es gebt zu oft Schiesserei do in Amerikaa. Is es die Medias Schuld? Is es die Bolitikal Parties Schuld? Alle Parties saage Sache die unfreindlich weeich die annere Parties sin…sell verschteh ich schunn. Awwer wann mer in Angscht lewe muss, weeich seine Ideas…sell is net mei Amerikaa. Ich hab gedenkt as Amerikaa waar en Land wu mer Freiheit zu schwetze un zu denke kennte…mitaus Angscht davun zu hawwe. Vielleicht is mei Amerikaa vorbei? Ich hoff net.
Unsere Leit misse zammekumme um unsere Brobleme zu fixe. Ich weess schunn as es viele Brobleme do in Amerikaa gebt. Viel Leit sin mitaus Arewet, viel Leit hen net genunk Geld um Ess-sache zu kaafe odder ihre Rechlinge zu bezaahle. Viel Leit sin mit em Kongress un die Regiering bees. Awwer, unseres Land un unsere Constitution gebt uns die Meeglichkeit unsere Brobleme zu fixe, mitaus Gwalt. Ich frooge mei Mitbrieder zu bede fer unseres Land un fer die Leit die Gschder gschosse waare. Nau is die Zeit fer unseres Land endlich zammezukumme un zammeschaffe fer die bessere Gut.
Do is en Audio Klip: Is unsere Gsellschaft verhaust?
PA Dutch 101 
Verhaust? Ich kenn’s Watt net eksekdli, awwe ich muss saage ass mer doh Brobleme hawwe.
Sellemol (in Arizona) waar der Kall ee bissel Schepp im Kopp; so ass ich’s verschtehene hob ghatt; der Kall Schgitsofrennia odde so ebbes ghatt un iss fer ne gudi langi Zeit anne Medizin gange. Awwe ferwas?
Mer henn in Alb. so en Kees ghatt. ‘S waar 2 Yaahr zrick. En Kall hot seini Mudder un sei Fadder dood gmacht un nau iss er im mei Heemet, im Schtaathoschbiddel, bekaas er waericklich verrickt iss.
Selli Zeide sinn schlimmi Zeide fer Leit mit Haernbehinderinge. Soldaate kaehre mit PTSD heem; ‘S gebt Kalls uff der Schtroos mit Schgitsofennia odde BPD. En liewwe Freind vun mir hot sich sellewe dood gmacht in Marz, 2010, bekaas die ‘Schtimme’ waare alle zu laut — er hot Aendifriess gedrunke.
Mir Amerigaaner henn fiele Brobleme heitzerdaag. ‘S aerscht Broblem iss ass mer alle unser Geld ausgewwe henn fer Tenks, Bombe, Aerblenns, usw. un mer henn zrickgehalde kee Geld fer die Graanke. Nau sinn die Graanke doh uff unsre Schtoose. Ferleicht waar’s net ne gudi Eidie fer so fiel Geld zurre milidaerische Abdeelinge ausgewwe? Ferleicht hedde mer uns am beschde forsarriye?
Ich schaffe daeglich im Hoschbiddel. Meini Klie-ende sinn alle die Haernbehinderinge. Mer sinn doh anne Geld un anne Hilfe un sie, die Graanke, sinn alli uffre Schtrooss. All’s Geld geht naus noochem Middeloscht-Grieck awwe unsere Graanke sinn doh uffre Schtroos. Unn, ‘s iss schlecht ass sie Fehler mache. Waericklich schlecht.
Sellewe, ich muss immi denke ass ich meini Noochberschaft helfe misse: uff unser Eewuhner, Soldaate, un meini Noochbere denke, awwe mer kenne net bekaas unser Geld geht arriyetswu (noochem Middleoscht).
Du hoscht de Film ‘Catch-22’ gsehne? Sell ‘Plot’ duhne mer yetz auslewwe. Mer henn granke Leit uff der Hand, un mer kenne sie net helfe bekaas mer henn kee Material mitwas mer sie helfe kenne. Unsre Henne sinn gebunne warre. (Kee Geld -> kee Medizien -> kee Helfe).
Ich glaab ass ferleicht mer en Mischteek gmacht henn.
Ich hab bloos 3 Frooge:
‘Wie fiel hemmer schunt ausgewwe?’;
‘Waar’s waericklich ne gud Eidie?’;
‘Hemmer ferleicht ebbes iwwerguckt?’
bloos mei Gdanke iwwe ne komplizierte Sach.
bil aus NM
Der Kall im Arizona? Waar verrickt; anne Helfe. De Rescht vun uns? Bis Heit simmer anne Helfe! Die Verrickte sinn uff der Schtroos, eb Soldaate, odde sie echti Verrickte sinn, un mer, ass ne Leit, sinn anne Helfe mitaus ennanner.
Un ich glaab ass “mit ennanner” iss de Haerzel fun unser Graft!