Halliches Dankfescht!

Guder Daag Blog Leser! Well, ‘sis widder die dritte Woch in Nofember un mir alle wisse was sell bedeidet: Dankfescht is bald do. Ya, uff em Dunnerschdaag is es Dankfescht. Es Dankfescht is en Daag fer Familye un nadierlich viele gude Ess-sache!

Ich gleich Dankfescht arrig viel, nicht yuscht fer der Iems awwer aa fer die Zeit mit meinre Familye zu hawwe. Alle Yaahr kummt mei Familye zu meim Daadi sei Haus un graad uff em zwelf Uhr esse mir. Mei Familye bauert Hinkel un Siesshinkel…so alle Yaahr hemmer en frisches Siesshinkel uff em Disch. Dann esse mir aa Filse, Aerebse, gedatte Welschkann, Brieh, Brot mit Butter un meinre Grossmudder ihr Kaerbsekuche. Alles is so appeditlich!

Ich denk as zu viel Leit denke yuscht uff em Iems an Dankfescht. Awwer, is der Iems die Ursach fer es Daag? Ich glaab net. Es Dankfescht is aa en Daag an der mir diefer denke solle. Mir solle an alles fer was mir Dankbaar sin denke. Selles Yaahr hawwich viele Ursache Dankbaar zu sei. Aerscht, ich un mei ganze Familye sin Gesund, in September bin ich zu meinre beschten Freind gheiert, in Moi hawwich en neies Haus gkaaft, un ich hab en gude Job. Uff em Dunnerschdaag waerr ich viele Danks gewwe fer alles was ich Dankbaar bin. Ich hoff as alle mei Blog Leser henn aa vieles uff was sie Dankbaar sei kenne.

Ich winsch eich en halliches Dankfescht un esst genunk awwer net zu viel!

Do is en Audio Klip: Halliches Dankfescht