Guder Daag Blog Leser! Heit will ich eppes iwwer der Keenich Froscht Schtrutz in Humbarrig schreiwe. Seitdem ich en gleene Kind waar, bin ich alle Yaahr uff em Keenich Froscht Schtrutz gange. As ich in der High Schul waar, hawwich in die Schtrutz marschiert…ich waar in der Baend. Mei Onkel hot en Haus graad uff em Schtrutz Route, so alle Yaahr gebt es en grosse Fescht datt. ‘Sis allsfatt schee mit re Familye datt zu schtehe um die Schtrutz zu lauere.
Do is en gleene Gschichte iwwer die Schtrutz:
Die Humbarriger Keenich Froscht Schtrutz is die greesste Schpotyaahr Schtrutz in re Oscht. Der Keenich Froscht Karnival (as es frieher bekannt waar) is schunn seit 1910 am laafe. Es hot ken Schtrutz gschwischich die zwee Welt Griege gewwe. Die Schtrutz hot viele High Schul Baends un annere Myusik Drupps vun all iwwer Pennsylvaania.
Die Schtrutz is allsfatt uff em letschde Samschdaag in Oktower, so viele vun de Schtrutz Leit sin in Schpuckowed Kostumes. Selles Yaahr gebt es net so viele Schpucke awwer es gebt nooch baut fimf Schule Baends un viel annere Floats. ‘Sis allsfatt schee zu sehne, wie die Kinner laafe um es Zuckergschleckes vun de viele Floats zu griege.
Die aerschte Float is allsfatt Keenich Froscht un der letschde Float is der Bellschnickel. ‘Sis en scheene Owed fer die Familye bei re Keenich Froscht Schtrutz. Seid eich aa uff em Keenich Froscht Schtrutz gewest?
Do is en Audio Klip: Keenich Froscht
PA Dutch 101 