Zwee waerd eens!

Guder Daag Blog Leser! Selle Woch schreib ich en frohe Blog Poscht. Nooch em naegschden Samschdaag waerr ich nimmimeh leddich sei. Ya, sell is recht…naegschde Samschdaag is mei Hochzichdaag. Selle Woch will ich glee bissel iwwer die Zeremonie schreiwe un unser Fescht.

Mei Maed, die Jessica, hot deitsche Voreldere, awwer sie un ihre Familye kenne die Mudderschprooch nicht meh schwetze un verschtehe. Awwer, Deitsch waerd en wichdige Rolle in re Zeremonie schpiele. Unser Programm is Zweeschproochig getippt un unser Paare (der Hochdeitsch gelannt hot) waerd ee Paar Gebede uff Deitsch saage! Ich bin arrig froh fer sell…un ich glaab mei Grosseldere un mei Familye waerre aa froh sei.

Die Hochzich fangt um elf Uhr in mei Heemets Karrich aa. Sell heesscht: Becker’s Sankt Peters Ludderische Karrich in Molltown, Barricks Kaunty. Ich waerr es fimftes Gschlecht die in sellre Karrich gheiert waerd. Ich denk as sell arrig Eppes is.

Nooch em Hochzich gehne mir alle zerick nooch meim Daadi sei Bauerhof. Datt hemmer en grosse Picknick. Mir waerre Glamme un Wascht esse, mit viel annere ess-sachs. Nadierlich waerrd es aa Bier gewwe…mei Familye un Freinde drinke gaarn Bier! Mei Grossmudder waerd die Kuche backe…so ich weess schunn as es arrig appeditlich sei waerrd!

Mir hen 50 Leit eigelaade un all 50 waerre kumme! Ich bin net naerfich…ich bin ready. Die Jessica un ich hen schunn viel geduh fer die Hochzich un mir sin ready fer die Feiere! Mir mache kenn Heiraatsrees nau. Unser Blan is fer naegschde Summer nooch em Sudd-Wescht USA zu reese!

Do is die Programm fer die Hochzichzeremonie:

1. Argelvorschpiel

2. Der Braut ihr Voraageh

3. Die Bewillkumm

4. Die Mehningaussage

5. Es Daagesbede

6. Es Vorleses: Psalm 100

7. Es Vorleses: Es Evangelium vum Yohannes 15:9-17

8. Die Breddiche

9. Die Schwure

10. Der Zuruf

11. Der Heiraatsege

12. Die Bedes

13. Es Vatterunser

14. Der Sege

15. Die Ausgeh

Hoffetlich waerr ich ee paar Pickders in re Zukunft hawwe. Naegschde Woch waerrd es ken neie Blog Poscht gewwe…ich denk as eich sell verschtehe kennt!

Do is en Audio Klip: Zwee waerd eens!