Alle Yaahr do in Pennsylvaania un in annere Schtaate do in Amerikaa hemmer Kaunty Feschte. Gwehnlich sin sie in Aaguscht. En Kaunty Fescht is en alde Tradition die vun Europa gebrocht waar. In die gudi aldi Zeite waar en Kaunty Fescht yuscht fer die Bauere um ihre Gediere zu zeige un aa fer die Bauerfraa ihre Kuche un Bois un annere Sache zu zeige. Alle hen gewollt en Bloh Bendli zu gewinne. Heit zu Daage sin die Fescht nooch en Kontest fer die Bauere awwer sie sin aa en Blatz fer Leit die nicht Bauere sin. Uff en Kaunty Fescht gebts viel zu esse (gwehnlich is die Iems net so gsundlich awwer verdammtsei appeditlich), Displays aazugucke un aa die Meeglichkeit viele handgemachte Dinge zu kaafe.
Do in mei Kaunty (Centre) gebt es aa nadierlich en Kaunty Fescht, awwer unser is glee wennig anners. Unser Fescht heesst: Grange Fescht un ‘sis schunn iwwer 130 Yaahre alt. Grange, as all die Leit do saage, is en Kaunty Fescht, awwer was arrig anners is, as viel Leit kumme zu Grange um zu kampe! Uff em Feschtgrund gebt es hunnert vun griene Zelter. Familyes kumme un lewe in die Zelter fer die ganze Woch! Viel vun de Familys henn die gleiche Zeltblatz ghatt fer meh as 80 Yaahre! Fer die Leit, die en Zelt nicht hot, kumme sie mit ihre grosse RVs. Ich weess net wie viel Leit datt kampe, awwer ich kann saage as es arrig viel is! Fer viel Leit do in Centre Kaunty, Grange is ihre yaehrliche Vacation!
Grange waar letschde Woch. Ich un die Jessica sin uff em Sunndaag nooch unsre Bsuch in re Karrich gange. Mir hen datt Middaagesse ghatt un dann hemmer viel Zeit mit Freinde bei ihre Zelter gebrocht. Grange is allsfatt en gude Zeit. Ich finn Kaunty Fescht arrig wichdig. Es gebt Leit die Meeglichkeit Gediere zu sehne un aa all die bauerliche Displays aazugucke. Ich denk zu viel Leit wisse gaar nix iwwer Bauere un vun wu ihr Esse kumme.
Hett eich aa eier Kaunty Fescht bsucht? Was hett eich datt gesse?
Do is en Link zu Grange Fescht: Grange Fescht Website
Do is en Audio Klip: ‘Sis widder Kaunty Fescht Zeit
PA Dutch 101 
Hi Doug, en Kaunty Fescht hemmer nit, awwer ‘s Schtaatfescht gleich ich en latt un ich duh es iedes Yaahr besuche! Mei Lieblingsesssache sinn die Bratpilzen, sie duhn arrig gud schmecke! Un mei Lieblingsding zu sehne sinn nadierlich die Hinkel, weil ich selwwer Hinkel hawwe. Sell Liegnerschtory aaf dei neieschde Blogposscht fand ich arrig luschdig! Ich hawwe aa vun sell Ziwwetkatzkaffi g’heert awwer nie browiert, un solche Scheiss daet ich a nie browiere, pfui Deiwwel!