Penn’s Busch!

Weescht eich was Pennsylfaania mehnt? Ich bin schurr as viel vun eich schunn weescht, awwer fer die Leit die es net weescht, do is die Andwatt: Penn’s Busch. Ich denk as die Naame arrig gut basst. Viel Land in Pennsylfaania is Busch…un net yuscht Busch, awwer scheene Busch!

Uff em letschder Freidaag hab ich den Itch gahtt in der Busch zu geh, so bin ich gange! Wu ich wuhn in Midde-Pennsylfaania, gebt es viel viel Busch. Viel vun de Busch do sin “Staat Busch” odder en “Staat Park”. Ich denk as net genung Leit yuuse unsere Busch un Parks. Die sin so arrig schee un friedlich. Pennsylfaania hot baut 2.5 Millyunn Acker vun Staat Busch! Un es gebt 117 Staat Parks.

Well, uff em Freidaag bin ich nadde gfaahre. Mei aerschte Schtopp waar Ole Bull Staat Park. Ole Bull waar en bekannde Man do in Midde-Pennsylfaania in de frieher 1800’s. Er waar vun Norway un er wott en Neie Norway do in dem Busch vun Midde-Pennsylfaania grunde. Er hat es browiert, awwer es is yuscht een paar Yaahre ausgedauert. Nau, wu sei Haus waar is en scheene Staat Park. Mer kann do campe geh, fische, un uff viele Wege in die Busch laafe.

Die Kettle Grick in Ole Bull Staat Park.

Nooch em Bsuch bei Ole Bull, bin ich nooch dem “Groose Schneit” vun Pennsylfaania gfaahre. Was? Es gebt en Grosse Schneidt in Pennsylfaania? Ich hab gedenkt as sell waar in Arizona! – Well, ya, der groos Groose Schneidt is in Arizona, awwer Pennsylfaania hat en Grosse Schneidt aa. Sell is net so gross un breet as der in Arizona, awwer es is aa schee un eppes zu sehne. Der Grosse Schneidt finnet mer in Tioga Kaunty, yuscht een paar Meils vun re Schtadt Wellsboro. Es gebt nadierlich en Staat Park datt, es heesscht Leonard Harrison Staat Park. Der Grosse Schneidt is 1,450 Fuus dief un en Meil breet. Pennsylfaania’s Grosse Schneidt waar vun en Glacier dausend un dausende Yaahre zerick gemacht. Nau, heitzudaage fliesst die Beint Grick darrich der Schneidt. Es gebt en Laaf Weg vun em Reef nooch unner bis zu em Bodde un die Beint Grick. Der Weg heescht “die Welschhinkel Weg”.

Der Grosse Schneidt vun PA, im Richting Nadd gucke.
Der Grosse Schneidt vun PA, in Richting Sudd gucke.
En Hasch uff em Weslschhinkel Weg.

Die Staat Parks un Staat Busch koschdet nix zu bsuche. So, pack en Picknick un geh mol nooch en Pennsylfaania Staat Park odder Staat Busch, hock dich datt unner en grosse Beint Baam un ruh dich aus! Odder geh fer en Buschlaaf, odder fisch fer en Forell, odder yaag en Hasch im Schpotyaahr. Es gebt viel zu duh in en Pennsylfaania Staat Park odder Staat Busch.

Naegschte Woch waerr ich en Blog Poscht schreiwe iwwer die Holz Industrie in die schpeeder 1800’s in Pennsylfaania.

Do is en Link zu re Staat Parks Website: Pennsylfaania Staat Parks

Do is en Link zu re Staat Busch Website: Pennsylfaania Staat Busch

Do is en Audio Klip: Penn’s Busch

4 thoughts on “Penn’s Busch!

  1. evolutionhiccup 23/08/2010 — 12:51

    Wissen Sie was? Sie sollen Kinderbücher auf Deitsch schreiben. Mir scheint, das wird gut für Kinder und Erwachsene Deitsch zu lernen. Nur eine Idee. Danke für das Post!

    – Adam

  2. Adam,

    Gross Dank fer die Idee. Ich weess as mir meh Kinnerbicher breiche. Ich winsch as ich meh Zeit hab, fer soddiche Dinge zu duh. Vielleicht schpeeder. Fer nau, bin ich zu fridde mit meim Blog.

    Gross Dank widder fer dei Comment!

    Der Doug

  3. Yoh. Ole Bull waar aa en bekannder Fiddelschpieler. Die Schtorie geht ass er iwwerall gedraewelt iss un hot in all die glee Schteddel gschpielt. Er waar arrich gut odde so’s gsaagt iss warre. Der hot en Schowpiess drauss gmacht wann er en arrich fensi Piess schpielt un wann Mensche gut uffgereggt waare hot er ee Schtring vun sei Fiddel abgerisse anne fer en Noot verliere. Un so er hot’s geduh biss er uff ee Schtring nooch weider schpielt.

    Ich wees net eb die Schtorie waahr iss odde net bekaas ich hab die saem Schtorie iwwe Paganini gheert. Awwe die Gschicht iss sicherlich en Deel vun Amerikaane.

    Ass ich bin en Fiddelschpieler selwert, ‘s freit mich fer die Schtorie weidergewwe. Ferleicht sott ich em Ole Bull sei Haus (odde eeyentlich ‘sei Land’) bsuche un en Paar Pickders dervun mache fer mei Schtorie besser mache.

    bil aus NMex

  4. Bil,

    Ich hab selle Gschichte aa gheert. ‘Sis in en Buch Barrick Gschichte aus em Midde Pennsylfaania. Was fer en gute Les! Ole Bull’s Haus is net meh. Datt in em Park gebt es yuscht die Foundation un die Schpring wu er sei Wasser grickt hot. Ich weess net wu er begraawe is. Sell muss ich mol glee bissel Research duh. Awwer ich waar arrig froh dei Gschicht heit Mariye zu lese. Gross Dank wie allsfatt!

    -Der Doug

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this:
search previous next tag category expand menu location phone mail time cart zoom edit close