Ich bin ken grosse Schport Mensch awwer zwee Schports hawwich arrig gaarn. Die sin Fuussball (net Amerikaanisch) un Eishockey. Schunn seit lang hawwich selle Schports gschpielt un im Guckbax aageguckt. Vielleicht waerr ich schpeeder en Schtick iwwer Fuussball schreiwe, awwer heit will ich eppes iwwer Eishockey saage.
Alle Friehyaahr kummt der beschde Zeit es Yaahr: die Stanley Cup Playoffs. Die NHL’s (National Hockey League) Yaahr laaft vun Oktower bis Abril. Darich es Yaahr, en Mannschaft waerd meh as 82 Schpiele schpiele. Die League waerd in Montreal, Kanadaa in 1917 gegrundet. Eishockey is en kanadaaische Schport awwer heitzudaag is es Schport die darich die ganze Welt gschpielt waerd.
Do in Pennsylvaania hemmer zwee Mannschafts: die Pittsburgh Penguins un die Philadelphia Flyers. As ich in Sudoscht-PA gebore waar, bin ich en grosse Philadelphia Fan. Ich lieb mei Flyers. ‘Sis schunn seit 1975 as sie die Stanley Cup gewonne hat. Die Penguins hen die Cup schunn 3 Mol gewonne. Die waare die beschde Mannschaft letschde Yaahr. Die beschde Mannschaft alle Zeit is die Montreal Canadiens. Sie hen die Cup schunn 22 Mol gewonne!
Selle Yaahr sin die Flyers un die Penguins nooch widder in de Playoffs. Mariyet beginnt die zwette Runde vun de Playoffs. Alle Runde sin die beschde vun siwwe Schpiele. Die Penguins schpiele gege die Montreal Canadiens un die Flyers schpiele gege die Boston Bruins. Wann die Penguins un die Flyers selle Series gewinne, waerre sie enanner dreffe! Sell waerd eppes! Oscht-PA gege Wescht-PA.
Hockey is schnell un hatt un arrig Gschpass aazugucke. Nemm mol glee bissel Zeit um en Schpiel im Guckbax zu sehne! Sei so gut un greisch mol fer die Flyers!
Do is en Audio Klip: Nau is Hockey Zeit
PA Dutch 101 
Ich hab da Sidney gsayna shpiela vann eah voah in Junior Hockey yusht eb es eah in de NHL voah. Even though, di maetsh voah en away-game fa Sidney, di crowd voah sei nohm en shreie in unison in de letshda minudda vun’s game.
Ich guck iwwerhaapt keh Schport. Sell is en Grund fer was mei Fraa mich geheiert hat!
Ich hab gheert, ass sie im alte Land alleweil die World Championships henn fer Hockey, un ass die Deitsche gehich die Buwe aus die Schteets gwunne henn – fer’s erscht mol, wann ich recht denke kann.
Milton,
Du kannscht Recht hawwe. Ich hab sell net gheert awwer wann die Deitsche besser as die Schteets gschpielt hen, sell is yo eppes!
Huddelwisch…
Ha ha ha…datt is en gude Grund fer dei Heiraat! So du guckscht kenn Schport, fer welle Grunde hot dei Fraa dich gheiert? Bischt du en romantische Bu?
-Der Doug