Geschder waar es 15. Yaahrliche Pennsylvanisch Deitsch Erbe Fescht in Lebanon. Nadierlich waar ich datt un ich will eich glee bissel vun em Fescht auslege. Es Fescht hot um halwe Zehe aagfange un is bis baut vier Uhr gange. Es Fescht waar uff em Campus vun Harrisburg Community College in Lebanon. Sie hen en scheenes Gebei datt.
Um halwe Zehe hot der Nei Dopelhock Sanger Chor gsunge. Sie sin en Drupp vun Leit die uff Deitsch alde un neie Lieder singe. Geschder hen sie viel Lieder gsunge. Sie hen Heili Heilo, Loss mol Friede Sei, Yesus liebt mir un ‘Sis en gleeni Welt gsunge. Viel Leit in re Audience hen mitgsunge!
Um halwe Elf hab ich en Rede gehalde. Mei Presentation war benaamt: “Pennsylvanisch Deitsch im 21. Yahrhunnert.” Ich hab glee bissel iwwer wie mer unsre Schprooch lanne kenne un was fer Resources gebt es um dei Deitsch zu verbessere. Ich hab aa en gude Lischt vun all die Deitsche Resources uff em Internet gewwe.
Um halwe Zwelf hen der Hanswasch (der Bill Meck) un sei Parnter Ischkabibble (der Leroy Brown) ee paar Deitsche Witze gsaat un ee paar luschdige Gschichte ausglegt. Alles was sie gsaat hen waar uff Deitsch un dann uff Englisch gsaat. Sell waar gut, weil viel Leit in re Audience Deitsch net verschtehe kennte.
Um een Uhr hot die Dr. Diane Wenger en Presentation gewwe. Ihr Presentation waar: “der Samuel Rex: Pennsylvanisch Deitsch Verkaafsmann”. Sie hot viel Research in Schaefferschteddel gemacht un nau hot en Buch iwwer der Samuel Rex gschriwwe.
Die letschde Drupp waar um drei Uhr un sie waar die Schwadore Schalle. Die Schwadore Schalle is en deitsche Kinner Chor. Die Kinner sin gschwischich fimf un achtzeh Yaahre alt. Die Alice Spayd hot die Chor die Myusick gelehrt.
Uff em Fescht hot es arrig viel Handwerksmenner un Handwerksweibsleit gewwe. Sie hen viele scheene Dinge zu verkaafe. Alle waare nadierlich Pennsylvanisch Deitsche Handwerke. Es hot aa viel gude Deitsche Iems gewwe, wie Bot Boi, Schnitz un Knepp, Melassichriwwelboi un Barickbier.
Sell waar en gude Daag fer unser Schprooch un Kuldur.
Do is en Audio Klip: Es Fescht in Lebanon
PA Dutch 101 
Viel Glück mit Ihre Textbuch.
Ich hab es Fescht arrig gut gegliche. Ich hab aa gut gesse.
So, how would you say this in Dutch? My partner in Deitsch studies and I were working on this phrase: “They would have already been gone”. We came up with, “Sie waere schunn gange
gwest sei?”
Huddelwisch…
Sell is recht: Sie waere schunn gange. Past Tense Subjunctive. Gut gemacht!
Der Doug