Geschder bin ich uff em gleene Rees gange. Alle Yaahr die PMEA (Pennsylfaania Myusick Schulmeeschder Drupp) hen District, Regional un Staat Feschte fer Baend, Chor un Orchester. As ich en High Schul Schtudent waar, hawwich in soddiche Feschte mitgemacht. Nau bin ich Schulmeeschder un mei Schtudente mache aa mit.
Mei Schul is en Mitglied vun District 4. District 4 is arrig gross. Es geht vun re Grenz mit Maryland bis zu Nadd Clinton Kaunty. Es gebt 27 High Schule in District 4! Geschder waar es Konzert fer die District 4 Chor. Die Gastgeber Schul waar Sudde Fulton High Schul in Warfordsburg, PA. Sell is iwwer zwee un en halwer Schtun vun mir weg!
Es Konzert waar um elf Uhr datt. Acht vun meine Schtudente hen in em Konzert gsunge. Es Konzert waar arrig gut. Mer kennte heere as die Schtudente viel ausge-iebt hen. Die Direktor waar en Brofessor vun re University Delaware. Die Chor hot meh as 120 Saenger drin!
Die Schtudente hen 13 Lieder gsunge. Sie hen yuscht een Lied in Hoch-Deitsch gsunge. Sell waar en Lied vun dem Johannes Brahms: “Wie schee sin dei Wuhninge”. Sie hen aa en Spanisch un zwee Latein Lieder gsunge. Es Rest waar in Englisch.
Ich denk as Myusick so wichdig fer die Schul un aa fer die Schtudente is. Es waar arrig wichdig fer mich as ich en Schtudent waar. Ich hoff as all vun meine Blog Leser aa Myusick Unnerschtitzer sin. Oft wann en Schul Geld braucht, losse sie die Myusick Programm wegfalle. Sell soll net gschehe awwer leider geht es so.
Well, sell muss genunk fer heit sei. Net vergesse as uff em Dinschdaag kummt der Punxsutawney Phil aus em Loch. Mal sehne was er iwwer es Wedder un dem Winder zu saage hot.
Do is en Audio Klip: Singe mir en Lied
PA Dutch 101 
Denki fer es Blog! Ich schwetze Deutsch un English, un hawwe “Schwetz mol Deitsch” gekaaft. Nau schtudiere ich Deitsch. Mach’s gut!
-Adam
Adam…
Gross Dank fer dei Comment. Wu kummscht du bei? Ich bin arrig froh as du Deitsch am lanne bischt. Fer was willscht du es lanne? Is dei Familye Deitsch? Ich hoff as es gut fer dich geht. Wann du Frooge hoscht, schreib ich mol en EPoscht odder loss mol en annere Comment do uff meim Blog.
Macht’s gut!
-Der Doug
Doug,
Ich wuhn in Allentown. Es Familye vun mei “Verlobte?” is Deitsch, awwer sie schwetze Deitsch net. Ich bin Deutsch, awwer ich maag mei Kinner Deitsch, Deutsch, un Englisch schwetze.
Adam
Adam,
Sell is arrig schee zu heere. Hoffetlich waerrd dei Verlobte aa Detisch lanne! Saag “Guder Daag” an all dei Kinner vun mir!
-Der Doug