Guder Daag Leser! Der Naame vun sellre Wochs Blog Poscht is en Satz as ich oft selle Woch gheert hab. Wie eich schunn weesscht, bin ich en Freind vun Techonology. Ich yuus mei Computer oft un gaarn. Ich schreib selle Blog un ich yuus Wikispaces fer mei Hochdeitsch Klaesse. Ich hab en iPod mit arrig viel Myusick druff. Ich hab en Cellfone un ich schreib viel Text Messages. Awwer fer en langi Zeit hab ich NEE zu Facebook gsaat.
Frieher hab ich allsfat gsaat as Facebook der Deiwel waar. “Es macht meh Probleme as gudi Dinge” (hab ich gedenkt). Leit henn liewer mit Facebook gschwetzt as Gsicht zu Gsicht. Sell hab ich dumm gfunne. Ich bin en grosse Fan vun Paerson zu Paerson Communication. All mei Freinde henn allsfat zu mir gsaat…ferwas hoscht du ken Facebook Blaat? Was is letz mit dir? ‘Sis en wunnerbaare Ding…du settscht mol en Facebook Blaat hawwe.
Nooch en lange Schleggelrei mit selle Idea hawwich endlich “ok” gsaat un hab en Facebook Blaat gmacht. Nau hab ich mich bekehrt. Ich yuus Facebook alli Daag. ‘Sis en gudi Weck mit viele Leit zu schwetze. Mer kann Pickders uffloade un dei Freinde uff Facebook kenne Comments datt losse. Es gebt aa viele PA Deitsche Facebook Drupps. Ich hab schunn efters eppes uff Deitsch uff Facebook gelese un gschriwwe. Was ich am beschde finn, is mer kann alde Freinde vun re ganze Welt finne un mit ihr “catch up”. Mer kann lese was Neies in ihr Lewe is un Pickders un Video vun ihr aa sehne.
So nau bin ich en Facebooker, un ich muss ehrlich saage as ich gleich es viel. Hett eich aa en Facebook Blaat? Wann ya, kenne mir Freinde sei?
Do is en Audioklip: Facebook
PA Dutch 101 
Ich hab aa en Facebook akaunt (mei Fraa iss arrich froh mitme Facebook), awwe ich gleich’s net fiel. Ich muss saag ass die Konsepp arrich schee iss awwe fer mich geht alles zu schnell. Gewennlich, duh ich BBS (Ich bin eebissel alt mit 53 Yaar un hab mit Waddefresser zimmlich frieh aagefange.) Ich hab imminoh en Unix-schellakaunt, yuus Linux heitesdaags, un bin an en Paar Netzforums.
Nau hawwich sell drowwe gsaagt, mussich saage ass ich mach en Bsuch in Facebook ee odde zweemol in der Wuch. Mei Naame datt iss Bil Linzie. ‘S freit mich immi fer Pickders datt sehne, awwe fer mich iss die Konferseeschun waericklich zu schnell fer mich mitzerdeele. Datt seehich all mei Freinde aus Dennemarrick, Deitschlann, Hoolland, un so weider, un all die Pickders fun ihre Kinner, Heiser, Lender. Pickders gleichich — die gehne iewe so langsaam ass ich! 🙂
der Bil ausme scheenschte Deel fun NM (‘s Deel mit mit Schnee un Beem)