Die Schul wu ich schaffe hot en gute Weibsleit Fuussballe Mannschaft. Selle Yaahr hen sie darrich es regular Season yuscht zwee Schpiele net gewunne. Deswege hen sie fer die District Playoffs qualifiziert. Viele vun de Meed hab ich in mei Hochdeitsch Klaesse. Ich waar sehr froh fer die Meed…sie hen viel ausge-iebt un arrig hart selle Yaahr gschpielt. Sie hen waerricklich die Playoffs verdient.
Uff em Munndaag hen sie ihres aerschten Playoff Schpiel gege Bellefonte. Bellefonte is aa en gude Mannschaft…so die Meed waerre die Hend voll hawwe. Es Wedder waar arrig kalt awwer ken Rege. Es Schpiel hot um halwer sechs aagfange. All de Schpieler waaren arrig eiferich un es Schpiel waar sehr schnell.
Um Halwezeit waar es zwee zu null fer die Wildekatze (sell is mei Schul). Nooch re Halwezeit hen mei Mannschaft gut gschpielt. Die annere Mannschaft hot versucht en Goal zu schiesse awwer sie hen ken Glick ghatt. Am End es Schpiel waar es nooch zwee zu null. Mei Meed kenne zum naegschde Runde geh un fer die Championschip gege State College schpiele. Ich hoff as die Mannschaft es winne kann.
Hett eich en Schport in High Schul gschpielt? Was denkt eich vun Fuussballe?
Do is en Audio Klip vun selle Poscht: Es Fuussballeschpiel
PA Dutch 101 
Hi Doug, ich gratelier dich zu dei erscht PD audio clip. Mer welle mehner heere vun sell – un verleich aa sehne? Was denkscht vun en Digicam Video, ass mer poste kann uff youtube.com un noht en Link gricke zu dei Blog. Sell schafft ferschur. Denk mol driwwer. Noht kennte mer der schmaert Kall aa mol sehne …