Yuscht guck mol! Ich wuhn in Pennsylfaania un am Dunnerschdaag der 15. Oktower hab ich schunn Schnee grickt! Yawell, ich weess as es alle Yaahr meeglich is, Schnee in Oktower zu griege, awwer normally wann mer Schnee im Oktower griege is es yuscht en “dusting”. Net selle Yaahr. Mei Haus hot schier gaar 2 Inches. Naadlich vun mir hot es iwwer 7 Inches gewwe.
Die Schnee waar so nass un schwer as viel Baame sin runnerkumme. Viel Leit hen ihr Leckdrick verlore. En Freind vun mir hot sei Leckdrick Freidaag um 4 Uhr mariyets verlore un hot es net bis 8 Uhr Oweds widderzerick grickt! As ich do uff mei Computer hocke, schneit es nooch widder. Die Wettermannsleit saage as es heit Flurries gewwe solle. Sell guckt wie Yenner drauss….harriyesses! Ich bin ready fer Spuckowed un Danksgewwe, net ready Schnee zu schaufle un Schlidde zu faahre.
Viel vun meine Schtudente hen geschder gsaat: “Ich hab gedenkt, as mir Global Warming hen! Was is mit dem Schnee letz?” Vielleicht is sell en guti Froge. Ich hab in dem Kalenner gelese as der Winder vun 2009-2010 en ganz schlechte Winder sei soll. Normally hot der Kalenner Recht. Yuscht mol sehne!
Hett eich aa schunn Schnee grickt? Was denkt eich, waeret der Winder ganz schlecht sei?
Do is en Audio Klip vun sellem Poscht: Schnee in Oktower
PA Dutch 101 
So veit henn even miah, in meinra naddana shadt, ken shnay grikkt un ich voon in ma Hintahland…
Yo. Geschdere hemmer aa Schnee in New Mexico grickt. Gewehnlich grigge mer Schnee fer Halloween ee Yaahr aus zehe. Wenn’s en gude Yaahr iss, hemmer 12 Fiess uffme Barrick! (Do im Winder faahre fiele Schi — uffme Barrick bin ich Schi-Teacher fer die Handicapped.) Fer uns fiel Schnee im Winder gut iss bekaas do iss’s immi arrich drucke un Schnee im Oktower en schee Seit iss, finnich.
bil aus NM
Nooch en Noot: mer henn schunt dreemol Schnee im Oktower kriggt! ‘S sott en scheene Jaahr uffme Barrich sei!
bil aus NM
Bil,
Harrieyesses! Sell is viel Schnee schunn. Ich hab gedenkt as es warm in Nei Mexiko waar. Is es normal viel Schnee in Nei Mexiko zu greige? Mir henn nix meh Schnee zidder Oktower. Mach mol en Schneeman un schick en Pickder vun sell zu mir…dann kann ich es uff em Blog poschte!
Macht’s gut!
Der Doug
Joh, mer grigge oft fiel Schnee. Mer wuhne fast in de Rockies beim 7000 Fuss in der Heh. Yetz henn mer kee uffme Bodde. Im Jenner adde Februar grigge mer oft fiel Schnee un uff de Barriye schteht gewennlich gschwischde 8-12 Fuss. Ee Pickder hawwich schunt imme Waddefresser — die Emailaddresse vun dir hawwich net. Schick mir en Poscht, dann kennich ‘s schicken. Deheem hawwich fiel meh Pickders!
bil aus NM
Bill,
Mei Email Addresse is: busterpa@yahoo.com. Du kannscht dei Pickder datt schicke. Ich kann net waarde es zu sehne. Mir hen aa kee Schnee. Die letschde zwee Woch waar es arrig waarm (fer November). Mol sehne was naegschde Woch bringt.