Die grosse Topik heitzudaage hot mit Gsundheitcare zu duh. Der Bresident fechdet mit dem Kongress nau fer en neie System. Viel Amerikaaner sin fer es un viel sin gege es. Es gebt grosse Iwwerschwetzunge un aa Dischbedaate iwwer selle Topik.
Eigetlich bin ich ken politische Man awwer ich bin mit dem Bresident an selle Topik. Ich kann net glaawe as es Leit in Amerikaa gebt, die ken Inschurance hat. Inschurance is deier un viel Amerikaaner kann es net afforde. Viel Arewetsgewwer kenne es aa net afforde. Was nooch schlimmer is, is as en Rees zum Dokder aa arrig deier is. Wann mer ken Inschurance hot, kann die Dokder mer net verbessere. Un was bassiert wann mer en Operation braucht? Sell is deiere as en Bsuch. ‘Sis leicht en Dausend Dollar beim Dokter auszugewwe un leichter in en Grankehaus.
Oft denk ich as viel Amerikaaner die Inschurance schunn hot, gebts nix drumm die viele Amerikaaner ken Inschurance hen. Is sell recht? Ich denk net! Mir sin en grosse, reiche Land. Unser Leit soll zum Dokder geh daerfe…mitaus Problems. Mir hen die beschde Dokters un Grankeheeser in de Welt. Unser Leit, alle Leit, solle es yuuse.
Ich hoff as ee Daag, selle Problem waerd gefixt sei. Es gebt viel Arewet zu duh….awwer ich glaab mir kenne es besser mache. Was glaabt dihr?
PA Dutch 101 
Yah, ich agree mit dir. ‘S System iss grank. Wu ich wuhn meh ass 49% vun de Leit hen ken Inschurans. Ich schaffe imme Hossbiddal sell seh ich yede Daag. Wenn mer froogt den Patient wu der Doktor iss, sie gewenlich anwadde “Ich hab kee.” Im letschte Yaahr hot mei Hossbiddal $2.5 Millyon ausgewwe misse. Wenn so ebbes bassiert dann geht Doktor Servisses noch meh hooch fer de Rest vun die Leit. Yah, ‘s System iss arrich grank.
bil
Mei Eldere henn gedenkt paar Yaahre zerick, velleicht zehle mir zerick noch Amerikaa geh fer wuhne (sie wuhne in Kanadaa sidder eb ich gebore waar), awwer sie henn gerealized ass sie ken Inschurans hawwe deede, deede sie zerick geh (sie henn ihre eegne bisness do in Kanadaa). Sie henn gerealized, ass sie besser sinn in Kanadaa, besonders ass sie elder sinn. S’iss schaade! Die Schteets muss net farriche. Scheint mir ass nochemol “Fear” vun Tscheensch gwinnere zehlt. Ennichau, ich bin mit Obama aa. Public Education fer all iss aa “socialism”, awwer sett mir niemeh education fer alliebber hawwe, unn yuscht fer die Reich, uff kors net?
Proudfoot un Bil, dihr hett es all recht gsaat! Ich glaab viel Amerikaaner hen Angscht vun “Change”. Un Socialism…harriyesses, saag sell Waad net! Sell is wie der Deiwele. Ich hoff as iwwedem, griege mir glee bissel Reform, domit all Amerikaaner zum Dokder gehe kenne.