En guti Gschichte.

Selle Summer hab ich es Buch “From the Rhine to Penn’s Woods” vun Carl Frey Constein glese. Es Buch waar in 2008 gschriwwe. Der Schreiwer: Constein, is en Deitscher vun Barricks Kaunty. Er waar en Englisch Schulmeeschder un aa en Schulsuperintendent. Er hot in de Army Air Corps in dem zwetten Weltgrieg gfochde. Er hot iwwer 96 Missions in Asia gfloge. Sell Buch is net sei erschtes Schtick. Er hot annere Bicher iwwer sei Erfaahring in dem Grieg gschriwwe.

“From the Rhine” hot gaar nix mit dem Grieg zu duh. Sell Buch hot mit re deitsche Familye in die frieh 1700s zu duh. Do is en katze Auslegung vun der Gschichte:

Adam Staudt un sei Familye hen Frankenthal, ihre Paelze Schtadt, in 1753 verlosse um der Vernichtdung vun de Dreissig Yaahre Grieg zu darichwitsche. Nooch en erschreckliche zwee Munet lang Seerees, kumme sie in Philadelfi aa un gehne nooch de Doppelbock Settlement yuscht weschtlich vun Reading.

Die Staudts schteh Yaahre vun extreme Schtrapatze in der Busch aus. Dann kummt 1776. Ihr Soh Dieter lischdet in General Muhlenberg’s Armee un fechdet in de Schlachte um Philadelfi. Die Revolution is net mit der Grieg vorbei. Dieter is en Pennsylfaania Assemblyman un schpielt en wichdige Rolle in de Fries Rebellion, en Prodescht as helft John Adams die Leckschen zu verliere.

Es Buch is sehr gut gschriwwe. Es gebt der Leser en Guck in 18 Yaahrhunnert Lewe. Es auslegt wie die deitsche Familye uff em Frontier gelebt hen. Was aa gut is, is das Constein hot deitsche Wadde in sei Buch gyuust. Do is en Beischpiel vun Seite 6: “One day Adam noticed Catherine was not herself. ‘Was is letz, Liebschdi?’, he asked.”

Wann mer meh iwwer PA odder Deitsche in PA lanne will…les mol sell Buch! Wann mer yuscht en guti Gschichte lese will…les mol sell Buch! ‘Sis vun Green Button Inc gedruckt. Mer kann es bei Masthof Press kaafe. Geh mol zur www.masthof.com um es zu kaafe. Es Buch koschdet $15.00.