Ich bin sehr dankbaar as so viele Leit mei Blog alle Woch lese. Awwer hett eich gwisst as es viele Bicher uff Deitsch gebt? In den letschten paar Yaahre sin viele guti Bicher rausgewwe. Viele Leit vielleicht wisse net wu mer sie kaafe kann. Ich hab gedenkt as selle Wochs Blog Poscht waerd iwwer die Meeglichkeet Deitsche Bicher zu kaafe.
Mer hot die Meeglichkeet Bicher im Internet un aa per Poscht kaafe. Ich waerd iwwer annerschdere Blatze schreiwe, un was fer Bicher sie hen zu verkaafe.
Die erschte Blatz is Edition Tintenfass. Sell is es Kumpanie in Neckarsteinach, Deitschland. Sie hen viele Bicher wie: Hans un Yarick, Mammi Gans, Die Nacht eb Grischtdaag un Der Glee Prins. Mer kann selle Bicher vun ihre Website kaafe: www.verlag-tintenfass.de
En sehr gute Website um Deitsche Bicher zu kaafe is Masthof Press: www.masthof.com Masthof Press is in Morgantown, PA. Sie hen viele Bicher in Deitsch un meh Bicher in Englisch die iwwer die Deitsche, Mennischte, Amische un Pennsylvaanische Gschichte sin. Mer kann viel vun ihre Website bschtelle.
Die letschte Blatz heesst The Family Album. Sie is en gleene Schdor un hot ken Website. Ihre Addresse is 4887 Newport Road, Kinzers, PA 17535 un ihre Fonnummer is (717) 442-0220. Bei The Family Album kann mer Mit Pennsylvaanisch-Deitsch darich’s Yaahr kaafe. Sell Buch is en “Reader” voll mit katze Schticke zu lese.
Wie eich sehne kennt, es gebt viele Meeglichkeete eppes in Deitsch zu kaafe. Blos mol der Schtaab aus dei Backebuch un kaaf eppes neies zu lese!
PA Dutch 101 
Ich habe nie von Hans und Yarick gehört; ist der Struwwelpeter in Pennsylvanien unter den Kindern sehr bekannt ? ~Bernhard
Hans un Yarick is der Deitsche Version vun Max un Moritz. Hoscht du vun sellem Buch gheert? Ya, mir hen in PA vun dem Struwwelpeter gheert. Wie is es in Texas? Aa so unner de Kinner?
Nein, keine Kinder lernen Deutsch mehr in Texas. Es gibt ungefähr 10,000 Deutsch sprechenden Leute hier in Texas aber 90% sind 60-100+ Jahre alt. Wahrscheinlich mit 28 Jahre, bin ich am jüngsten! Man weiß genau ja nie, weil der Staat Texas so wirklich groß ist. Für Kinder zu lesen hier gab es, meistens die Bibelgeschichte in Bilder. Heutzutage alle die Kinderbücher sind auf Englisch. Oh well.