Letschde Woch hot der Reading Eagle en Series vun Ardickeln die iwwer “Common Courtesy” rausgewwe. Es waar in fimf Schticke gschriwwe. Die fimf Topics waare: Der Unnergang vun Civility, En Guck uff unser Schprooch, Wie die Leit heitzudaage aaduh, Was is zu Mannier gschehe un Wie mer zu Incivility antwatte. Die Artickeln waar sehr gut gschriwwe. Die Schreiwere hen waericklich en gute Guck uff die Gsellschaft gemacht.
Ich will yuscht ee paar Comments gewwe vun was ich gelese hab un was ich in mei Lewe gsehne hab. Die erschte Schtick saagt viel iwwer fer was unsere Gsellschaft Civility net meh hot. Manniche Leit saage as mir zu weit gange sin…mir kenne net zerick kumme. Ich hoff as sell net die Waahrheit is.
Die zwette Schtick schwetzt iwwer unser “schlechte” Schprooch. Mer heert Fluchwadde iwwerall: im Guckbax, im Schwetzkaschde, uff em Internet Deswege schwetze die Kinner un aa die Uffgwaxener so schlecht! Ich weess as in Deitsch Fluchwadde normal sin awwer mir schwetze net so in Publik.
Die dritte Schtick waar vun unsere Gsellschaft un unser Gleeder. Fer was draage so viel Leit soddiche Gleeder? Viel Leit hen fast kee Gleeder aa! As Schulmeeschder seh ich es alle Daag! Die Kinner, abbadich die Meed, draage nixs viel. Odder die Kinner draage Gleeder domit die annere Kinner ihre Tatoos sehne kenne. Ich saag allsfat, sei so gut, duh en Sweatshirt aa!
Die vierte Schtick schwetzt vun Mannier un Courtesy. Waericklich, wie unsere Gsellschaft ken Mannier hot. Ich bin so bees wann ich ammenent bin un die Leit schwetze uff em Cell Phone. Letschde Woch waar ich in en Schdor. Ich waar im Line um zu bezaahle. Der Drupp var mich, hot die ganze Zeit uff seim Cell Phone gschwetzt, aa wann er uff em Cash Register waar! Dann hot er bezaahlt un is er fattgange un hot gaar nixs zu dem Verkaafer gsaat! Sell find ich arig! Ich hab aa en Cell Phone, awwer ich weess wann die rechde Zeit es zu yuuse is.
Die letschde Schtick hot ausglegt wie mer zu Incivility antwadde solle. Ich denk as sell die schwerschde Ding zu duh is. Zu viel Leit sehe soddiche Dinge awwer hen zu viel Bang um eppes zu saage. Ich glaab ich waerd meh Mut in der Zukunft hawwe um eppes zu de grobbe Leit zu saage. Epper muss eppes saage un duhe um en Ennerring zu mache.
Henn alle vun eich soddiche Dinge aa gsehne? Was is unser Zukunft? Do is die Link zu der Ardickeln. Ich hab Glaawe in Leit, hoffetlich waerd alles besser sei…un aa es net so lang ausdauert.
PA Dutch 101 
Ich les ebmols Zeidingsardikeln vum 19. Yaahhunnert un ich meen as viel Leit in der Zeit aa net so gut maniert waare. Awwer man hot’s net so oft gsehene verleicht wie heit. Und mit em Guckbax und Movies, es is leichder solche Sache sehne un verbreede.
Ich waar aa eemol en Schulmeeschder un ich wees gut was du saagscht, was die Schulkinner aaduh odder wann sie net gununk aaduh.
Ich muss hoffe as es meh Leit gebt, die manierlich und heeflich sin as die die es net sin.
I checked out the “En Friehyaahr fer die Mudderschprooch” site and there is no way that I can find to contact them (the one link I did find does not work). I am not sure if there is any literature to promote these events but it would be nice to have them available here at Landis Valley Museum.
Please advise.
Mer wuhne naddlich vumme glee Schteddel in naddost NM, ee Schtunn weit vun Santa Fe un zwee Schtunne weit fun Albuquerque. Die Unnerschidd gschwischde die Leit do un die in de grossi Schtedt iss bemerkwaddich. Es Lewe imme Schteddel iss langsammer un ruhicher; mer brauche net hie un do so schnell laafe. Mer hen fiel meh Zeit fer mitnanner schwetze. Fer mich Millich kaafe, faahrich bloos 5 Minudde un ass ich imme Schdor bin, binnich da 45 Minudde bekaas es iss gans normal do mit Mrs. Romero blaudere fer rausfinne wie die Kinner sinn un aa ihr Mudder, mit Mr. Ruh blaudere fer rausfinne wies Wedder in Gallinas iss un was denkt iwwe de nei Mayor, un rausfinne vunre Kaschier wie ihr Kind inre Schul dutt, usw.
Ich glaabs ebbes mitre ‘Zeit’ zu duhne hat. Mer hen fiel Zeit fer blaudere un bekaas s Gebiet so glee iss mit wenniche Familyes, ‘s iss uns imminoh wichdich selli Dinge rausfinne. S Lewe do imme Schteddel iss dicht eegebunne mitme Lewe vun all de annere un ‘Common Courtsey iss imminoh ‘s Oil fer unsre social Maschien.’ In de grossi Schdedt hot mer fiel wennicher Zeit unso muss ihr Zeit yuse meh fer hie un do schpringe un net blaudere.
bil
Craig,
Dankeaa fer dei Comment. Ich hab nooch net uff em Mudderschprooch Website gschpielt. Vielleicht solle mir en EPoscht zu der Michael Werner schreiwe.
Bill,
Dankeaa fer dei Comment. Ich hab net geweesst as es Deitscher in Nei Mexiko gebt! Bischt du vun PA un fer was bischt du in Nei Mexiko?
Doug
Ich bin aus Mich. eeyentlich un meinre Grossmudder ihr Familye sinn alli aus Ohio kumme. In meinre Familye binnich der eenzichde der Deitsch schwetze kenne.
Ich bin in NeiMexico zidder 76, un ‘s gebt en Handfool do wu zammekumme kenne fer Blauderei. Die menschde sinn aus Deitschlann herkumme.
bil